Bolşevik’uri A K’azeta: Mç’ita Murutsxi

K’azetas ambaepeşi mardzgvanis Tzitaşik naxadziru Latinuri tzalamoni ağani Lazuri alboni oçinapams. Tzitaşik albonis ip’t’i, “ağani Turkuli alboni” şk’ala aini naiç’aren boncape, hinişi tudesti Kiriluri (Slavuri) boncape meçams. Ham boncape şuk’aleti hinişi tude “doskidineri boncape lazuris” dudç’arate Lazurişi orijinali boncape misali meçameri ik’orotsxen.

Sovyeturi Lazepeşi Mç’ita Murutsxi yoxoni k’azetanişişi maartani nomera 1929 tzanaşi ma-7-ani tzilvas Soxumis kogamaxt’u. K’azetaşi çunyes “Ap’xazia Şkaguroni Komitaşi Organi” ç’aruntu, k’azetak, K’omunist’uri Partiaşi Ap’xazia borge partiaşi Lazuri propaganda organimuşi ort’u do hişeni.

Mç’ita Muru3xi, oğinde do k’ap’ula k’ale ç’areri a but’k’oni a k’azeta ort’u do k’ap’uloni but’k’amuşişi (pavrimuşişi) tudeni mardzgvani kyoşes “coğabinameçams redaktori İskyanderi Tzitaşi” ç’arumt’u. Tzit’aşik k’azetaşi editori naort’u ham noç’araşen magnapenan. Tzitaşik, SSCA-ş (Sovyeturi Sosialisturi Cumxuriyet’epeşi Artoba) Lazepeşi Helimişi Xasanişk’ala enni çinoberi do becit’i jur sembolimuşişen armuşi on do himuk Lazuri dest’i svarapeşi maç’are do Sovyeturi Ap’xaziaşi Lazuri mek’t’ebepeşi tigemçaleti ort’u (Sarp’uri Lazepesti mek’t’ebi kuğurt’es).

K’azetas namadzirenan enni jindoni ç’ara, Leninişi 1896 tzanaşi ma-19-ani ap’rilis xapisxanas naç’aru a propaganda ç’ara’n. K’azetaşi manşetis ham ç’araşi do yaninemuşis naon kianaşen ambaepeşi jindole didi puntopete “Ok’tyabrişi İnk’ilabişi ma-12-ani tzanobaşi ndğas mteli dunyaşi proleterepe do zeri milletepes çkuni cumaloni selami! Sk’idas K’ominterni proletaroni ink’ilabişi teşk’ilmxenapu! Medulyepeşi sinifişi gyandgoneri do ok’omk’orobu ren -Lenini” unç’arun.

Leninişi ç’araşi yanineti “Dunyaşi Ambaepe” coxoni borge bdziremt. Ham borges, Parisişen jur, Londra do Kabilişenti ar ambai kon. Sovyeturi ambai ajansi TASSişen ç’op’ineri, Lazuris golakteri ambaepeşan ip’t’inerimuşis Londras naien xukyumet’iş mole prot’est’ope do mitingis naiu xalk’i do polisi k’abğa imeselen. Parisişi ambaiti, “İnk’ilabişi Odidanu” dudç’arate meçameri on. Hakti Fransa K’omunist’uri P’art’ianuripeşi moloxunu operasionepeşi, P’art’iaşi k’azet’a “Humanit锺i oyoxute p’rot’est’oşeni ok’obğeri namulun şilya do şilya k’omunist’işi eylemepe do hinik jandarmape muç’o ojgines him niçen. Enternasionali birapa obirute jandarmapeşk’ala naok’iilen k’omunist’epeşi eylemepe serigverdişak’is idevamu it’us k’azetak. Kabili svanuri amabaisti k’azetak Afganist’anis naiu xetzela (hegemonia) gokturu ognapams.

K’azetaşi emogindeni butk’aşi tudes “K’unduraşen Ok’tyabrişa” yoxoni, gektalaşi ist’oria naimesels do Tzitaşik Lazepes Guma Gektalaşi vorsinobape/k’ai moğamupe nagamagnapams a st’at’iati kuğun.
K’ap’uloni but’k’as “Lazuri Op’ut’epeşi Oskidinu” dudç’araşi tudes Ap’xazia do Aç’arias nask’udun Lazuri op’ut’epeşan tanerepeşi p’olit’ik’uri do nasionali leksepemuşi meç’areri on. Ziya Nurik, Gudautas Turkuri mek’t’ebişeni “Turkuli Mek’t’ebi” yoxoni ambaimuşis 1927 tzanas naguintzu mek’t’ebişi 1928s mancenobamuşi devlet’işi iusis mek’t’ebi ogurapu daha pelaperi diu ia nait’us ambai burmeşi ip’t’inei ambai’n. Elaçama yoxoni maç’arepeşan Mat’iat’rek, Gudautaşi Lazuri op’ut’epes naibiren Lazuri t’eat’re obirupe imeselams do ham obirupe Afoni do Soxumisti ibiru ia it’us. T.B. elaçama yoxo naixmars maç’arekti Abgarxukişi Lazepeşi dzoepeşeni isinapams do dido Lazişi ulet’ale osk’edinumuşişi sixint’epe ç’arums. Abgarxukişi Lazepeşeni SOKPşi (Sovyeturi Ok’ok’at’eri K’omunist’uri P’art’ia) didi k’oçepeşan meşvelu imedams. Oçamçireşan Tanurakti “Memitanit” yoxoni ambaimuşis Oçamçires nask’udun dido Lazişi 1928 tzanas naguintzu Lazuri mek’t’ebinişis devlet’ik varnuşvels do mamgurapalepes tuteri cenç’areri var meçams deine xukyumet’is meşabğen.

Aç’araşi burmes çinoberi Lazepeşen Mamedi Vanlişi,”Tzoxle Mevulurt” dudç’aroni ambaimuşis p’ri-gektala do gektala şuk’ale muk’aese ikums do mcveşi xalk’i Lazepeşi gektalate naik’azanes xak’epe ik’oretsxams. Sarp’is K’omsomoli (SOKPşi ağnemordale organizasioni) aza naon biç’i do bozope naonan do Sarp’is Lazurite Rusuri do Korturi nenapeti naiguren oxobotzonamt Vanilişişen.

K’azetas ambaepeşi mardzgvanis Tzitaşik naxadziru Latinuri tzalamoni ağani Lazuri alboni oçinapams. Tzitaşik albonis ip’t’i, “ağani Turkuli alboni” şk’ala aini naiç’aren boncape, hinişi tudesti Kiriluri (Slavuri) boncape meçams. Ham boncape şuk’aleti hinişi tude “doskidineri boncape lazuris” dudç’arate Lazurişi orijinali boncape misali meçameri ik’orotsxen.

Ham ç’arapete nagamaxt’u emogindeni Lazuri k’azeta Mçita Murutsxi Lazi ak’tivist’epek Turkiaşi Lazistanisti t’k’obaşe komuğes do k’azeta Mustafa Kemalişi xeşç’arate Turkias xususiet’it’e diyasağuti komişk’unan.

 

09.10.13/Haskyoyi-P’oli