Aşk’va Cevoç’amt

Şk’u Lazi voret! Xvala Lazi… Lazuri nenate ginç’araten ç’e Lazepe, e misa do ticeğeri na sk’udun xalk’i şk’uni, nananena şk’unite ginç’araten. Mara xvala Lazuri do Lazepeşeni var, ntsaşi tude muti ien na hini ginç’araten na maxenanşuk’u.

Lazepeşeni mteli k’oçis a lak’ide kuğun. Kimik Turki, kimik Kortu, kimik Xorumi, Rusi, kimikti Kortu do Xorumi ok’ont’aleri ar xalk’i oran deine it’uran. Na ginç’arit iri sozi şeni gumdze gumdze masinaperan mara şk’u, Ağani Murutsxişi mazaxmet’epe, Lazepe mi navaroran him var p’t’k’vaten. Şk’uni nogure Lazepe mipe oran him ot’k’valu ort’asen. Hamuşeni gumdze a gzaşi magzalepe viit. Mi voret, mipeşen voret, solendo moft’it, so vulurt do so vidaten, mu p’at’, mu maxeneran, muç’ote maxeneran? Ham k’it’xapete do hanişi cuğap’epete gamagiğaten k’azeta şk’unişi numerape, hişo mepşonumt. P’ap’upe mo işk’inamt hus t’k’vati meşonit, momoyşoramt!

Viduşunaten do p’nç’araten, “nena putxun, ç’ara dosk’udun” do himuşeni, ginç’araten, minç’aratere. A gzaşi ceç’apas voret şk’u do var madzirenan so idasen na cebrert ham gza. Arağorda p’at’ere iri mutxa, ar noderi/mecişi derdi miğuran Lazepeşeni, Lazeburaşeni, derdi miğuran dobadona do kianaşeni. Arağorda bdziratere so idasen ham gza, arağorda bditsaten vana vibgaraten, arağorda viçalişaten, arağorda domanç’inanen, arağorda guri cemat’anen, arağorda vixelaten. K’abğaşi arto nena viaten do zuğa şk’unişi, abcape şk’unişi, mt’ape şk’unişi,rubape,op’ut’e do noğape şk’unişi nena, nananena şk’unite, him xvameri timya şk’unite viğaten metropolepes. Metropolepeşi, iri kianaşi nena xolo nananena şk’unite ptoraten Lazist’ani şk’unis.

Mu bgorumt / mu minonan?

Şk’u Lazi voret! Xvala Lazi… Lazuri nenate ginç’araten ç’e Lazepe, e misa do ticeğeri na sk’udun xalk’i şk’uni, nananena şk’unite ginç’araten. Mara xvala Lazuri do Lazepeşeni var, ntsaşi tude muti ien na hini ginç’araten na maxenanşuk’u. Lazepesti, muşebura na isinapams a nena aan deine kamaft’it ham mcveşi do ağani p’aramit’is. Hus p’aramit’is, hekyaes cevoç’amt’ ok’ok’at’eri, iri ndğa daati virdat deine ozmonute. T’k’vati, nena muşişeni, k’ult’ura muşişeni, minoba muşişeni, adalet’i, oxoşk’va, cuma-daloba şeni do xeleri a kianaşi ezmocete sk’udun do iri xavinobapes / p’eat’i ndğalepes hamuşeni na nuxondun mteli k’oçepeti giyoxamt. Ti kezdit aşk’va, ğurun muti miğuran!

Oxoşk’vas msk’va ar şura kuğun, himuşi şuraten amtzik’atina oşvancuşeni on ham k’azeta. Xalk’epeşi cuma-dalobas vicert, kianaşi mteli zeri xalk’epeşi artobas vicert. Na ğurun nena şk’uni svamorgvalis sk’udala var içodasşa mo içodert’as deine hay voret.

K’azet’aşk’uni ip’t’i jur tuteri p’eriodite gamaxt’asen, ora moxt’asis ptsadaten do beki tuteri dop’tzop’xaten. Hus xvala Lazuri nenate ç’areri ç’arape ort’asen, ham na domaç’irenanşeni, haşo on. Lazuri nenaşi k’ap’et’oba do msk’vanoba mtelis adziran dei birtum Lazuri nena ort’asen ham but’k’apes, k’azet’aş pavrepes. Vana, na moxt’asen numarapes Turkuri nenate ç’areri a but’k’ati viduşunamt. Xvala Turkuri var, Zuğauças na isinapinen iri nenapete: Xorumuri (Romeika), Korturi (Çveneburi) do Sumexuri (Xemşinuri) but’k’a do ç’arapeti nosi şk’unişi ar kinaris elemidzunan, xalk’epeşi mandzageroba do cuma-daloba ixelas deine. K’azeta şk’unişi but’k’ape mteli dost’epes gontzeri ren, gişk’urt’an!

Gumdze gumdze visinapaten xolo, hus voçodinat k’azet’aşi ham mk’ule “manifest’o”-şi t’ek’st’i. Na maxenanenpe do na va maxenanenpe iri bz’iraten ham ogzalas. Xeiri bz’irat k’azeta şk’unişen do tzana do tzana sk’udas, nena şk’uni maan. Lazepeşi nena do minobaşi xak’epe eç’opinuşeni, Lazuri nenaşi edgitinuşeni ham but’k’ape k’evi, manceloni a cepe ias.

Xela do k’aobaten…

İsmail Güney Yılmaz

Ağani Murutsxi, no: 1, Çxalva (St’aroşina) ’13